PECO, nagapasalamat kay Judge Contreras sa pagmando nga ibalik ang operasyon sa kompaniya

ILOILO CITY – Ginmando ni Hon. Emerald Requina-Contreras, presiding judge sang Branch 23 sang Ramon Avanceña Hall of Justice nga ibalik sang More Electric and Power Corporation (MORE Power) sa Panay Electric Company (PECO) ang operasyon bilang electric power provider sa Syudad sang Iloilo.

Ini ang kasunod sang ginpatigayon nga hearing sa expropriation case sang MORE Power sa mga assets sang PECO.

Sa interview sang Bombo Radyo kay Atty. Estrella Elamparo, legal counsel sang PECO, tuman ang pagpasalamat niya kay Judge Contreras bangud sa pagmando niya nga magbalik sa operasyon ang ila kumpaniya.

Suno kay Elamparo, tubtub sa Marso 26, mahimo nga mag-operate ang PECO sa diin ang nasambit nga adlaw patigayunon ang masunod nga hearing sa nasambit nga kaso.

Nagakahulugan nga ang tanan nga mga pisikal nga propedad kag ang pagkontrol sa empleyado ang dapat nga dumalahan sa gihapon sang PECO.

Nagalaom man si Elamparo nga gilayon nga ipatuman sang sheriff ang pinakaulihi nga desisyon sang korte sa nasambit nga kaso.

Sa pihak nga bahin, gin-athag naman ang korte nga ang ginpagwa ni Energy Regulatory Commission (ERC) Chairperson Agnes Devanadera nga desisyon kaangot sa ERC Case No. 2018-019 MC nga napetsahan sang Marso 5, 2020 ang indi pa makabig nga Certificate of public convenience and necessity (CPCN) kundi isa ka order.

Ang nasambit nga application ang ginpasa sang MORE Power sa diin ini ang gintiguluhan nga “In the Matter of the Application for the Issuance of a Certificate of Public Convenience and Necessity (CPCN) for the Operation of the Electric Distribution System for Iloilo City, with a Prayer for Provisional Authority”.

Ini ang na address mismo kanday Mr. Roel Castro, President kag Chief Executive Officer sang MORE Power kag Mr. Luis Miguel Cacho, President kag Chief Executive Officer sang PECO.

Sang Marso 3 tubtub 4, 2020, ginpahayag ni Devanadera nga nagpatigayon sang occular inspection ang ila technical personnel agud mag-verify sang actual nga status sang distribution sang network.

Diri kag natukiban sang ERC nga ang MORE Power ang may kontrol na sang 5 ka mga substation kag may 4 pa ka mga power suppliers.

Sa ulihi, adesisyunan pinaagi sa resolution nga i-revoke ang CPCN sang PECO kag ihatag ang full operation sa MORE Power; mag isyu sang Provisional Authority santo sa Sec. 8 sang Executive Order 172 nga naga authorize sa MORE Power sa pag operate sag distribution network; pag authorize sang MORE Order sa pagpatuman sang last approved distribution charges sang PECO kag pag-require sa MORE Power sa pag-source kag pag-procure sang power requirements santo sa Section 5 sang Republic Act 11212 samtang wala pa sila nakakuha sang Certificate of Exemption halin sa Department of Energy (DOE) sa pagsulod sa emergency power supply agreements kag pag-source sang requirements halin sa current power generation suppliers sang PECO.

Suno kay Atty. Elamparo, temporary permit lang ang ginhatag sang ERC sa MORE Power sa diin nagakahulugan nga indi pa sila mahimo mag operate.

Magahimo naman sang legal remedies ang PECO sa diin magapadala sila sang sulat sa ERC agud maathagan sa nasambit nga desisyon.

Nahibaluan nga sa ginpatigyon nga hearing, gin-athag ni Judge Contreras nga luyag lang niya nga indi maapektuhan sang power blackout ang mga pumuluyo sang Syudad sang Iloilo bangud wala pa niya nahibaluan ang kapasidad ukon ikasarang sang MORE Power.

Magluwas sini, nagakadapat man nga magbantay lang anay ukon mag-obserbar ang mga tinawo sang MORE Power sa mga pamaagi sang PECO kun paano ang magpadalagan sang power distribution.

Wala naman ginbaton ni Judge Contreras ang nangin pahayag sang MORE Power nga may mga tawo na sila sa mga substations bangud para sa hukom mga tinawo man sa gihapon sang PECO ang mga nagapadalagan sang operasyon.