ILOILO CITY – Nagdinaguso subong nga gab-i ang mga pasahero sa Iloilo Fast Craft & Roro Terminal kasunod sang pagpauntat sang byahe sang motorbanca bangud sa pagbubo sang ulan sa syudad sang Iloilo.
Sa interview sang Bombo Radyo sa isa sa mga empleyado sang Philippine Ports Authority nga si Remo, iya ginpahayag nga indi makabig nga stranded ang mga pasahero bangud nga padayon ang byahe sang MV Yohan padulong sa Guimaras.
Suno kay Remo, duha ka fast craft ang nagabyahe padulong sa Buenavista kag duha man ang nagabyahe padulong sa Jordan kun sa diin ang tagsa ka fast craft ang may passenger capacity nga 400.
Ginpahayag ni Remo nga kutub 10:00 sang gab-i ang byahe sang MV Yohan apang mahimo nga may yara sang extension sa tion nga magdamo ang mga pasahero.
Normal lang suno sa natungdan nga magdinaguso ang mga pasahero bangud nga naga-ulan kag wala sang byahe ang motorbanca.
