ILOILO CITY – Padayon ang massive information dissemination campaign nga ginahimo sang Department of Health Region 6 kasunod sang deklarasyon nga yara na sa Code Red Sub-level 1 ang Pilipinas.
Ini matapos nga nagdangat na sa 6 ang kumpirmado nga kaso sang coronavirus disease 2019 sa bug-os nga Pilipinas sa diin na rekord diri ang isa ka kaso sang local transmission.
Sa interview sang Bombo Radyo kay Dr. Mary Jane Juanico, pinuno sang Infectious Disease Section sang Department of Health 6, iya ginpahayag nga hugot nga gina-abisohan ang publiko nga masami nga maghugas sang kamot kag i-practice sang insakto ang cough etiquette.
Suno kay Juanico, ang mga barangay health emergency response team ang importante man sa kada lugar sa diin ini ang makabig mata kag baba sang barangay sa diin sila ang una nga maga monitor sa mga residente ilabi na sa mga tawo nga naghalin sa iban nga pungsod.
Sa bahin naman sang 62 anyos nga lalaki nga amo ang ika una nga kaso sang localized transmission, padayon pa nga ginahibalo sang Department of Health kun sa diin nakuha sang pasyente ang virus.
Mahimo pahayag niya nga nakasalamuha lamang sang lalaki ang tawo nga may dala sang virus rason nga ini siya ang nalatnan apisar wala man siya sang history of travel.
Nagpanugyan si Dr. Juanico sa publiko nga mangin kalmado; vigilante; kag indi magpati gilayon sa mga nagalapt nga mensahe kun indi man lang kumpirmado.
Nahibaluan nga humalin sang Enero 1, na rekord ang 42 ka mga persons under investigation sa Western Visayas sa diin 41 diri ang negatibo ang resulta sa COVID-19 kag na discharged na samtang 1 ang nagapabilin sa ospital.
