ILOILO CITY – Hugot nga ginapanindugan sang Iloilo City Police Office nga wala sang abduction nga natabo sa bahin sang Progreso, Lapuz, Iloilo City kaina sang udto.
Una na nga gin-report ni Punong Barangay Myde Sollano sa Bombo Radyo nga may yara sang ginabanta apat ka mga lalaki nga nagpilit pasulod sa salakyan kay Ramon Salarda, 66.
Ginparahan pa sang Punong Barangay ang salakyan agud nga mag untat apang dire-diretso nga ini nga naguwa sa barangay.
Sa interview sang Bombo Radyo kay PCapt. Shella Mae Sangrines, tagpamaba sang Iloilo City Police Office, iya ginpahayag nga antes pa man nga gin-report ni Punong Barangay Sollano nga may nagkuhakay Salarda, una na nga nagpahibalo ang mga operatiba kay Sangrines nga may yara sila sang ginapatigayon nga asud-asud nga anti-illegal gambling operation.
Suno kay Sangrines, ginpahibalo man sa iya nga basi may yara sang mga pumuluyo sa syudad nga makibot nga wala na ang ila himata, kinahanglan ini nga re-check sa pinakamalapit nga police station bangud mahimo nga nalakip ini sa gindakop bangud sa anti-illegal gambling operation.
Pahayag niya, may procedure nga ginasunod ang mga operatiba sa pagdakop sa tawo nga naglapas sa layi apang may yara man kun kaisa nga sirkumstansiya nga indi maka-stick ang pulis sa ila ginasunod nga procedure.
Dugang pa sang natungdan, limitado lamang ang iya nga impormasyon tuhoy sa pagdakop kay Salarda kag maga coordinate pa siya sa intel opperatives nga amo ang nagpanguna sa operasyon agud nga makakuha sang dugang nga detalye.
