ILOILO CITY – Nagpatigayon sang Motu Proprio investigation ang National Police Commission Region 6 may kaangtanan sa “abduction” nga natabo sang Marso 3 sa Rizal St., Iloilo City Proper.
Sa interview sang Bombo Radyo kay National Police Commission Region 6 Director Atty. Joseph Celis, iya ginpahayag nga kun mapamatud-an nga ang Regional Drug Enforcement Unit amo ang nagkuha kag nagpilit sakay sa salakyan kay Anthony William Landicho, 36, sang Nueva Valencia, Guimaras, 5:50 sang hapon sang Marso 3, posible nga sila ang ma dismiss sa trabaho bangud indi ini lango-lango nga ginpatigayon antes ang buy bust operation.
Indi buot silingon suno kay Celis nga nagmandu si Presidente Rodrigo Duterte nga dakpon ang mga nagahimo sang ilegalidad sa pungsod, ma pinagusto na lang ang mga kapulisan sa pag aresto.
Nagakadapat pahayag niya nga himuon sa gihapon sang mga kapulisan ang legal procedure sa pag aresto sa isa ka tawo nga nakahimo sang sala kag indi pagpaagi sa pag-abduct.
Kun mapamatud-an man nga ang Regional Drug Enforcement Unit amo ang utok sang tanan nga natabo sang Marso 3, wala sang luwas ang RDEU bangud may video kag mga laragway nga nakuha.
Ang video kag laragway ang magamit nga ebidensiya kag mahimo man nga matudlo ni Landicho kun bala ang mga nag abduct sa iya amo ang mga otoridad sa bahin sang Regional Drug Enforcement Unit.
Dugang pa sang direktor, kun mapamatud-an man nga ginkuha sang mga katapo sang RDEU ang P20,000 nga kwarta ni Landicho amo man ang iya grocery, madugangan pa gid ang kaso nga ila pagaatubangon.
Apang sa subong, indi pa mapat-od ni Celis kun bala Regional Drug Enforcement Unit ang nag abduct sa lalaki sa dalan Rizal.
