SIBUNAG, GUIMARAS – Pagtib-ong sang healthy lifestyle kag pagtipig sa kalibutan ang nangin katuyu-an sang pamilya Mella sa pagtukod sang Jem Home Farm Eco Adventure sa Brgy. Millan, Sibunag, Guimaras.
Sa Good Morning Philippines program, ginpahayag ni Engr. Edmon Mella, tag-iya sang Jem Home Farm Eco Adventure, nga ang iya hilig sa pagpanguma ang nangin liyabe kun nga-a napatukod ang nasambit nga farm kun sa diin ang pagpatubo sang mushroom ukon uhong ang ginasentrohan.
Suno kay Mella, ang uhong ang may yara sang madamo nga benepisyo nga mahatag sa ikaayong lawas kag nagapahagan-hagan man sang epekto sang climate change.
Ginpahayag ni Mella nga ang pagpatubo sang uhong ilabi na ang oyster mushroom ang applicable sa temperatura sang Pilipinas rason nga ini ang ila nga gintutukan nga mag-asawa paagi sa permaculture.
Sang una suno sa natungdan, para lamang sa konsumo sang ila pamilya ang katuyu-an sang pagpatubo sang oyster mushroom tubtub nga ini ang ila na nga nangin palangabuhi-an.
Lakip sa produkto nga halin sa oyster mushroom amo ang chips, atsara, ginamos, kimchi, puto pao, pie kag ice cream.
