ILOILO CITY- Pagpasiguro nga hilway ang mga pumuluyo sang syudad sang Iloilo sa Coronavirus disease 2019 ang rason kun ngaa ginkansela ni Iloilo City Mayor Jerry Treñas ang mga aktibidad sa syudad sang Iloilo sa diin ginalauman nga magadagsa ang madamo nga tawo.
Sa interview sang Bombo Radyo kay Iloilo City Mayor Jerry Treñas, iya ginpahayag nga indi siya maluyag nga sa subong, may yara sang mga pagtililipon bangud man sa pamahog sang virus.
Lakip sa mga ginkansela ang dalagko nga mga buluhaton sang syudad kaangay nalang sang Paraw Regatta , Iloilo Summer Arts Festival, kag mga sports activities.
Ang labing una nga Iloilo Summer Arts Festival nga una gintalana sa Abril 3 tubtob Mayo 17 ang sayluhon sa Oktubre.
Istoryahan naman sang alkalde kag organizers kun san-o liwat italana ang Paraw Regatta.
Indi man pagdayunon ang mga moving up ceremonies sang day care schools sa syudad.
Ang nasambit nga lihok suno sa alkalde ang kahabin sang paghalong sang ikaayong lawas mga pumuluyo sa syudad sang Iloilo.
Magapakig-angot man siya suno sa natungdan kay Iloilo Governor Arthur Defensor Jr. agud mas mapasanyog ang pagpatigayun sang mga lihok agud indi makasulod sa syudad kag probinsya sang Iloilo ang coronavirus disease 2019.
