CAPAS, TARLAC – Komportable ang sitwasyon sang mga gin quarantine nga mga crew sang Diamond Princess Cruise Ship sa Athlete’s Village New Clark City, Capas, Tarlac.
445 tanan nga mga Filipino crew ang yara nagapabilin subong sa Athlete’s Village.
Sa interview sang Bombo Radyo kay Ryan Magno, isa sa mga crew sang cruise ship, iya ginpahayag nga umpisa sang gin quarantine sila sang Pebrero 25, yara lamang siya naga isahanon sa isa ka kwarto kag ginadul-ongan lamang sang pagkaon.
Ang kwarto pahayag niya ang kumpleto sa gamit kaangat sang Television set, Refrigerator kag internet.
May yara sang 13 ka mga kaupdanan niya nga gindala sa ospital sang damlag lang bangud naglain ang ila mga pamatyag apang nag negatibo man ang ila resulta kag nakabalik na subong sa quarantine facility.
Hugot nga ginapatuman sang Department of Health ang pagtsekyar sa kada crew kada adlaw agud nga masiguro nga wala sang flu like symptoms ang mga ini.
Kumpleto man nga ginahatag ang mga kinahanglanon sang mga naka quarantine kaangay sang vitamins, energy drinks kag paninlo sa lawas.
Ginadayaw man sini ang on-time nga pagdul-ong sang pagkaon sa ila.
Sa subong, nagapabilin ang Diamond Princess Cruise Ship sa Japan sa diin ini ang i-disinfect matapos nga madamo nga mga pasahero kag crew ang nagpositibo sa coronavirus Disease 2019.
Samtang natalana naman nga matapos ang quarantine period sang mga crew sa Marso 10 apang posible makahalin sila sa Athlete’s Village, sa Marso 11 na sang aga.
Ini bangud pahayag niya nga ginaproseso pa ang ila transportasyon papauli sa ila tagsa ka mga lugar.
Suno kay Magno, mabalik siya sa gihapon sa pagtrabaho sa cruise ship sa tion nga matapos ang duha ka bulan nga paghatag sa ila sang mandatory-rest ukon pahuway.
Dugang pa sang natungdan, masobra 500 nga mga Filipino crew ang nagatrabaho sa Diamond Princess Cruise Ship apang ang iban ang ginpabilin sa Japan agud nga ma obserbahan bangud sa pagpositibo sa COVID-19.
Sang natukiban nga madamo na nga mga pasahero kag crew ang nagpositibo sa virus, nagapadayon sa gihapon ang trabaho nanday Magno.
Ang una nga kaso pahayag niya amo ang Chinese nga babaye nga nagsakay halin sa Hong Kong kag nagreklamo nga nagalain ang iya pamatyag.
Siya ang gilayon nga gintsekyar sa clinic sang barko kag natukiban nga nag positibo sa COVID-19.
Padulong sa Japan ang cruise ship kag naga amat-amat damo ang kaso sang coronavirus disease sa diin naalarma ang Ministry of Health sang Japan.
Gin-anunsyar gilayon sang kapitan sang barko nga i-isolate ang mga tawo sa sulod sang cruise ship agud nga indi na magdugang pa ang mga kaso sang COVID 19.
