ILOILO CITY-Ginmando sang Iloilo City Police Office Director ang pagpatigayun sang imbestigasyon sa ginapahayag abduction nga nagluntad sa Rizal St., Iloilo City sang damlag lang.
Sa interview sang Bombo Radyo kay Iloilo City Police Office Director Police Col. Eric Dampal, iya ginpahayag nga nagmando na siya commander sang Police Station 1 nga imbestigaran ang natabo.
Suno kay Dampal, matapos niya nabaton ang impormasyon tuhoy sa ginapahayag abduction, nagpaguwa siya gilayon sang memorandum para sa imbestigasyon.
Nagpasalamat sa Bombo Radyo ang commander sang Police Station 1 bangud sa ekslusibo nga pagdala sa nasambit nga isyu.
Sa interview sang Bombo Radyo kay Police Major Francisco Paguia Jr., hepe sang Police Station 1, iya ginpahayag nga santo sa video nga nakuha sang Iloilo City Police Office, makita nga may yara sang natabo nga pagpilit sa biktima agud nga magsakay sa salakyan.
Suno kay Paguia, indi man niya gilayun mahambal nga katapo sang Regional Drug Enforcement Unit ang pwersa nagpasakay sa biktima magluwas na gid lang kun may witness nga makapamatuod.
Ginpahayag ni Paguia nga gina-engganyo gid ang biktima nga magpakig-angot sa Iloilo City Police Office agud nga makuhaan sang statement ukon affidavit.
Ang mga videos suno kay Paguia ang isa sa mabakod nga ebidensya apang kinahanglan nga may yara sang affidavit nga makadugang sang pamatuod sa ginapahayag abduction.
Sa tion nga may yara sang kumpirmasyon sang mga biktima, makabig na ini nga dako nga ebidensya agud mapasakaan sang nagakaigo nga kaso ang responsable sa natabo nga insidente.
