Ginaduso ni Senador Francis Kiko Pangilinan ang libre nga pag pa test sang coronavirus disease 2019.
Sa interview sang Bombo Radyo kay Sen. Pangilinan, iya ginpahayag nga mabug-at na para sa isa ka tawo nga magbayad pa sang pag pa test para hibaluon kun bala positibo ukon indi sa COVID-19.
Ginakonsidera man sang senador nga indi lang ang mga makitaan sang sintomas ang libre sa pag pa test kundi amo man ang mga tawo nga na kontamina apisar nga wala sang may makit-an nga sintomas.
Nagpanawagan man si Pangilinan sa gobyerno nga sa tion nga may mga empleyado sang gobyerno nga i-quarantine ukon ma ospital bangud sa pag positibo sa nasambit nga virus, nagakadapat nga may sweldo man ini sa gihapon nga pagabatunon.
Indi lamang sa mga pampubliko nga sektor kundi amo man sa mga pribado nga kompaniya sa diin nagakadapat nga suportahan ang pagpa quarantine sang empleyado agud nga indi na malatnan pa ang iban nga trabahador.
Ang pag absent sang isa ka tawo bangud nga gin home quarantine ang indi mangin basehan nga hatagan ini sang penalidad ukon indi pag sweldohan.
Bangud man sa isa ka resource person nga nagtambong sa Senate hearing nga natukiban nga nagpositibo sa COVID-19, gin lockdown na ang senado.
Importante gid suno kay Pangilinan nga gina obserba ang “social distancing” bangud ini ang importante sa paglikaw sa coronavirus disease.
Mismo ang senador ang nag home quarantine man bangud ang himata sang iya nga saff ang nagpositibo sa nasambit nga virus.
Tuman na lang ang iya nga pagpasalamat bangud nag iya nga staff ang nag negatibo sa COVID-19.
