ILOILO – Ginaduso sang mga alkalde ang pagpatuman sang lockdown sa bug-os nga probinsya sang Iloilo agud nga indi na maglapta ang Coronavirus Disease 2019 (COVID-19).
Sa ginpatigayon nga pagsinapol sang League of Municipalities of the Philippines-Iloilo, ginpahayag ni Mayor Raul Banias sang Concepcion, Iloilo nga mas makapaayo nga ipatuman na ang lockdown sa bug-os nga Iloilo.
Sa pagpaathag ni Banias nga isa ka doktor, kulang sa equipment ang mga hospital sa probinsya lakip na diri ang Dr. Ricardo Y. Ladrido Memorial District Hospital nga ginaduso nga mangin quarantine facility.
Suno kay Banias, bisan nga wala pa sang COVID-19 patients sa Iloilo apang mapin-ot sa gihapon para sa medical personnel ang pagtatap sang madamo nga pasyente nga naadmit sa hospital.
Mas makapaayo man suno sa alkalde nga ipatuman sa bug-os nga Panay ang lockdown apang pahanugutan sa gihapon ang delivery sang goods agud nga indi maapektuhan ang supply sang balaklon.
Suportado naman ni Mayor Trexie Fernandez sang San Enrique, Iloilo kag presidente sang League of Municipalities of the Philippines-Iloilo, ang ginaduso nga lockdown sa probinsya.
Sa pagpaathag ni Fernandez, indi man mahinago nga bisan ang mga manggaranon nga pungsod kasubong sang China kag Estados Unidos ang nabudlayan sa pagtapna sang nasambit nga virus rason nga dapat nga magpatuman sang precautionary measures ang Pilipinas nga mas imol ipaanggid sa mga nasambit nga pungsod.
Bilang alkalde, ginpahayag ni Fernandez nga may mga lihok na nga ginahimo agud nga matapna ang paglapta sang virus kag bilang presidente naman sang League of Municipalities of the Philippines-Iloilo, may yara sang resolusyon nga igapasar nga nagaduso nga dapat ipatuman ang lockdown sa bug-os nga probinsya.
Nakadepende naman kay Iloilo Gov. Arthur Defensor Jr. kun dugangan ang ginapatuman nga precautionary measures magluwas sa pagkansela sang tanan nga mass gathering kag events.
