ILOILO– Magapadala sang sulat subong nga adlaw si Iloilo Governor Arthur Defensor Jr. sa mga public utility operators sa Iloilo may kaangtanan sa executive order nga iya ginpapanaog tuhoy sa community quarantine kag travel restrictions.
Sa interview sang Bombo Radyo kay Governor Arthur Defensor Jr., iya ginpahayag nga ang sulat ang iya ipadala sa mga operators sang roro vessels, roro ports, airports kag mga airlines companies, agud may ihibalo sila tuhoy sa travel restrictions nga ipatuman sa probinsya sang Iloilo.
Suno kay Defensor, kinahanglan mapaathag sa mga tawo nga may yara sang restrictions ang pagpasulod sang mga tawo sa probinsya kag indi na magissue pa sang tickets.
Pahayag pa sang gobernador, ang nasambit nga lihok ang isa ka paagi agud punggan nga makasulod sa probinsya ang mga persona nga posible infected sang coronavirus disease 2019.
Sa bahin naman sang Land Travel medyo mabudlay suno kay Defensor, apang may ipahamtang nga mga checkpoints nga magabantay sang entry kag exit points.
Nagpanugyan naman ang natungdan nga kun indi man importante ang laktan, likawan ang pagsimpon sa madamo nga tawo agud malikawan ang paglapta sang virus.
