ILOILO CITY – Walo ka kondisyon ang ginkasugtan sang mga Local Chief Executive kag mga tiglawas sang concerned agencies may kaangtanan sa lihok nga ginahimu batok sa Coronavirus Disease 2019 (COVID-19).
Ang mga nasambit nga kondisyon ang ginkasugtan kadungan sang pagsinapol sang Regional Disaster Risk Reduction and Management Council.
Sa interview sang Bombo Radyo kay Office of Civil Defense 6 Director Jose Roberto Nuñez, iya ginpahayag nga ang tagsa ka Local Government Unit sa Panay ang may kaugalingon na nga Executive Order sa pagpatuman sang community quarantine.
Lakip sa mga ginkasugtan amo ang mga masunod:
- Ang Office of Civil Defense 6 ang magapadala sang sulat kag magahingyo sa Armed Forces of the Philippines sa paggamit sang helicopter agud ma-transport ang Personal Protective Equipment halin sa Department of Health Central Office padulong sa Region 6 office.
- Ang Department of Health ang magatukod sang technical working group nga amo ang magapangita sang improvised materials para sa Personal Protective Equipment.
- Ang Philippine Ports Auhtority ang maga-istrikto sa pagbaton sang delivery sang goods kasubong na lang sa pagdumili sa mga wala nakasulod sa delivery van.
- Ang tagsa ka Local Government Unit sa Panay ang maka-angkon sang harmonized executive order may kaangtanan sa border restrictions.
- Maka-angkon sang unified border restrictions ang tagsa ka Local Government Unit nga magalawig tubtub sa Marso 31 agud nga hatagan sang ligwa ang incubation period ang Persons Under Monitoring.
- Ang Philippine National Police ang magapanguna sa pagbantay kag pagpatuman sang border restrictions.
- Ang Provincial Disaster Risk Reduction and Management Office ang magapakig-angot sa Philippine National Police ilabi na sa pagpatuman sang border line patroling.
- Ang Office of Civil naman ang magapanguna sa paghatag sang update tuhoy sa ginapatuman nga community quarantine.
