ILOILO CITY – Nagalaom si Iloilo City Mayor Jerry Treñas nga ikonsiderar sang mga local chief executives sa Western Visayas ang iya ginaduso nga ospital para sa mga pasyente nga maga positibo sa coronavirus disease 2019.
Sa interview sang Bombo Radyo kay Mayor Treñas, iya ginpahayag nga ang Western Visayas Sanitarium sa Sta. Barbara, Iloilo ang iya plano nga himuon ospital para sa tion nga may mag positibo sa COVID-19, itingob ang mga ini sa isa lang ka ospital.
Suno kay Treñas, madasig nga maglaton ang nasambit nga virus kag delikado kun impunon ang mga positibo sa COVID-19 sa mga ospital nga may nagkalain-lain nga pasyente kag balatian.
Kun pahanugutan nga tingbon ang mga pasyente, mas magadamo ang kaso sang COVID-19.
Samtang nagakadapat man nga may yara sang test kits kag testing area sa syudad sang Iloilo amo man sa Western Visayas agud nga mapadasig ang pag monitor sa mga tawo.
Pahayag niya, nakig istorya siya kahapon sa University of the Philippines -National Institutes Of Health kag mangin available na ang mga test kits kuntani apang ang problema amo nga indi pa ini accredited sang Research Institute for Tropical Medicine.
Sa pihak nga bahin, ginahulat subong ni Mayor Treñas ang sabat nanday Punong Barangay Jonalyn Provido sang Bito-on, Jaro kag Marjorie Marañon, ang tag-iya sang Mandurriao Cockpit Arena.
Suno sa alkalde, seryoso kag hugot ang ginapatuman ang mga pagsulundan agud nga malikawan ang paglapta sang COVID-19 kag indi mahimo nga indi ini pagsundon sang mga tawo sa syudad.
Una na nga ginpahayag ni Treñas nga naghiwat sang pista kag may mga peryahan pa sa Brgy. Bito-on Jaro samtang gina-alegar naghiwat pa sang bulang ang nasambit nga arena apisar ay mandu nga ginadumilian ang mga aktibidad nga may madamo sang tawo.
Ang mga computer shops naman nga nagapahanugot sa mga kabataan nga magsulod samtang wala sang klase, ipasirado ini gilayon ni Mayor Treñas.
