ILOILO CITY – Nagakadapat nga mag-agi pa sa legislative process ang ginpasar nga ordinansa sang Iloilo City Council may kaangtanan sa 8:00pm-5:00am curfew nga ipatuman sa syudad.

Sa interview sang Bombo Radyo kay Iloilo City Mayor Jerry Treñas, iya ginpahayag nga wala pa nakalab-ot sa iya ang ordinansa nga napasar sang city council bangud ipaagi pa ini sa legislative process.

Suno kay Treñas, tanan nga layi kag ordinansa nga ginpasar sang legislative body ang kinahanglan pa nga i-transcribe kag ipasa sa presiding officer agud nga siguraduhon kun ini bala ang insakto antes niya pirmahan, kinahanglan nga i-certify ang board of secretary ini kag ipasa sa alkalde para sa pag apruba.

Sa tion nga mag-abot sa iya ang ordinansa, iya anay ini nga lantawon kun bala insakto ukon indi.

Kun insakto ang ordinansa, pirmahan ini sang alkalde kag magapatigayon sang pagsinapol kaupod ang mga sektor agud nga ma ubra ang implementing rules and guidelines agud indi magsalangisag ang mga kapulisan, Public Safety and Transportation Management Office kag Barangay Tanod.

Pahayag sang alkalde, ang curfew nga ipatigayon ang para sa ikaayong lawas sang mga Ilonggo kag ma practice ang “social distancing” bangud kun padayon nga nagalagaw saguwa ang mga tawo, mas dako ang tyansa nga ma infect ini sang virus.

Malipayon man ang alkalde nga gindeklara ni Presidente Rodrigo Duterte nga ipaidalom sa state of calamity ang Pilipinas sa diin mahimo na nga magamit sang local government unit ang pondo.

Tinguhaan ni Treñas nga makabakal sang protective gear ukon equipment para sa mga frontliners bilang proteksyon sa ila ikaayong lawas.

Suno sa alkalde, nagakinahanglan pa sang siyam ka doktor kag 28 ka mga nurse ang Iloilo City Government.

Sa iya naman nga ginaduso nga covid-19 hospital, kinahanglan pahayag niya nga mangin “creative” agud nga maplastar ang tanan nga kinhanglanon.

Kun wala sang hospital beds dugang sang natungdan, mahimo man nga makagamit ang pasyente sang folding beds.

Ang importante pahayag ni Treñas amo ang kahilwayan sang tanan.

Gin-athag man niya nga indi lockdown ang syudad sang Iloilo sa baylo naka temporary quarantine lamang.