ILOILO CITY – Nagdepensa ang barangay officials sang Bito-on, Jaro, Iloilo City sa ginapahayag nga pagpahanugot nga maka operate ang peryahan sa lugar amo man ang fiesta apisar nga may mandu si Iloilo City Mayor Jerry Treñas nga kanselahon ang mga pagtililipon kaangay sang aktibidad sa kapistahan.
Sa interview sang Bombo Radyo kay Punong Barangay Junalyn Provido, iya ginpahayag nga nga sang ginpahibalo na sa ila sang Marso 11 nga ginadumili-an ang pagtililipon sa syudad, epektibo gilayon nga nagpatigayon ang barangay sang house to house campaign agud nga ipahibalo sa mga residente nga wala sang fiesta nga patigayunon bangud sa kahangawa sa coronavirus disease 2019.
Suno kay Provido, sa bahin sang peryahan, wala niya ini ginpahanugutan nga mag operate bangud sa tatlo ka mga rason.
Una amo nga mandu sang alkalde agud malikawan ang covid-19, ika-duha amo nga may mga kapulisan nga nagabantay sa lugar kag ika-tatlo amo nga wala sang permit ang peryahan agud nga mag operate.
Samtang suno naman kay Mary Jane Fullon, manug bantay sa peryahan, bangud nga wala naga operate ang perya, nadesisyonan na lang niya nga magbaligya sang shake kag fishball.
Apang apisar magbaligya, gamay sa gihapon ang iya mabenta bangud tuman ka gamay ang nagabakal.
