ILOILO CITY – Epektibo na umpisa buwas nga adlaw, Marso 20 tubtub sa Abril 14, ang Executive Order ni Mayor Jerry Treñas nga nagadeklarar nga ipaidalom na sa Enhanced Community Quarantine ang syudad sang Iloilo.
Ini matapos nga napirmahan na ni Treñas ang Executive Order No. 055 bilang lihok sa nagataas nga kaso sang Coronavirus Disease 2019 (COVID-19).
Sa interview sang Bombo Radyo kay Treñas, iya ginpahayag nga kadungan sang pagpatuman sang Enhanced Community Quarantine, hugot nga igapatuman ang curfew hours halin 8:00PM tubtub 4:00AM kun sa diin ginadumili-an na ang pag dine-in sa mga restaurants.
Suno kay Treñas, magapabilin nga bukas ang mga restaurants apang para lang sa take-out kag delivery kag gin-athag sang alkalde nga mahimo sa gihapon nga makasulod sa syudad sang Iloilo ang halin sa iban nga lugar sa Panay apang kun mahimo, ang mga wala sang importante nga transaksyon ang magpabilin na lang sa ila balay.
Ang Enhanced Community Quarantine ang magapabilin suno sa natungdan ang magapabilin tubtub nga may yara sang kaso sang COVID-19 sa pungsod.
Kinahanglan suno kay Treñas nga magsakripisyo bangud nga ang ikaayong lawas ang nakataya kag kulang sa medical equipment ang mga hospital sa syudad sang Iloilo para sa pagtatap sa COVID-19 patients.
Kadungan sini, ginpirmahan naman sang alkalde ang pondo para sa food assistance kag cash for work para sa mga apektado nga residente.
Nahibalu-an nga apisar ginpaidalom sa Ehnanced Community Quarantine, magapabilin nga bukas kutub 7:00 sa gab-i ang mga masunod: merkado, sari-sari stores, water refilling stations, laundry shops, bangko, pawnshops, burial and crematory services, automobile repair shops kag agricultural shops.
Ginapanahugutan nga maka-operate tubtob 8:00 sang gab-i ang mga masunod: medical clinics, diagnostic centers, laboratories, money transfer services, remittance centers, hardware stores, gasoline stations, restaurants kag fastfood chains.
Mahimo naman nga maka-operate paglampas sang 8:00 sang gab-i amo ang mga masunod: hospital and medical facilities, convinience stores, fast foods chains, media outlets, shipping and cargo companies, warehouse, public utilities, industrial supply and repair kag Business Process Outsourcing kag Knowledge Process Outsourcing.
Exempted naman sa Curfew Hours kag Enhanced Community Quarantine amo ang mga masunod: mga nagahatag sang medical services, mga nagatrabaho sa funeral services industry, emergency responders, sercurity services, bangko, money transfer services, groceries kag convenience stores, public markets, pharmacies kag drug stores, food chain ukon restaurants, delivery personnel, mga nagatrabaho sa kompaniya sang raw materials ukon processed food, empleyado sang mechanical manufacturing establishments, telecommunications, energy companies, sanitation, private individuals, govenrment skeletal forcecapital markets kag iban pa nga private kag government employees.
Pahanugutan naman ang pagbyahe sang bus, taxi, public utility vehicle, tricycle, trisikad kag public utility jeepney.
