ILOILO – Magadonar sang testing kits, surgical mask, N95 mask kag headcovers si anay Iloilo 4th District Cong. Ferjenel Brion kaupod ang anak nga si Iloilo 4th district Cong. Braeden John Biron.
Sa interview sang Bombo Radyo kay anay Iloilo 4th District Cong. Ferjenel Brion, iya ginpahayag nga posible nga sa masunod nga semana, maka-abot na sa syudad sang Iloilo ang 500 nga Seegene COVID 19 PCR based testing kits, 20,000 nga surgical mask, 15,000 nga headcovers, 2,000 nga N95 masks, 50 liters nga ethyl alcohol kag hypertensive medicines.
Suno kay Biron, ang testing kits ang igahatag sa Western Visayas Medical Center samtang ang mga surgical mask, headcovers, N95 mask, alcohol kag bulong ang tungaon sa mga hospital sa syudad kag probinsya sang Iloilo.
Ginpahayag ni Biron nga sa subong, ginahitso na ang delivery sang nasambit nga medical supplies ilabi na nga tama ka kulang ang supply bangud sa nagataas nga kaso sang Coronavirus Disease 2019 (COVID-19).
