ILOILO CITY – Istrikto nga ipatuman umpisa buwas nga adlaw, Marso 21, ang pagdumili sang pagbyahe sang Public Utility Jeepney sa syudad sang Iloilo.
Sa interview sang Bombo Radyo kay Jeck Conlu, pinuno sang Public Safety and Transportation Management Office, iya ginpahayag nga may yara sang 10 ka bus nga magabyahe sa syudad sang Iloilo umpisa buwas nga adlaw, Marso 21, agud nga may sakyan ang mga nagatrabaho.
Suno kay Conlu, ang byahe sang bus ang maga-umpisa 5:00 sa aga tubtub 8:00 sa gab-i kag may extension kun kinahanglanon apang siraduhon ang mga shortcut nga dalan bangud nga lima lamang ka entry kag exit points ang paga-agyan sang salakyan.
Lakip sa Entry and Exit Points amo ang Mohon sa Arevalo, Hibao-an sa Mandurriao, Ungka, Buhang kag Coastal Road sa Balabago, Jaro.
Kadungan sini, gin-athag sang natungdan nga one-seat-apart ang sundon sa bus kag ginadumili-an ang angkas sa motorsiklo.
Ginpahayag man ni Conlu nga ang Iloilo City Government ang magahatag sang 1 ka bus kag 3 ka modernized jeepney para sa mga empleyado sang Iloilo City Hall kag dapat man sundon ang social distancing.
Ang mga taxi, tricycle kag trisikad ang pahanugutan nga makabyahe sa palibot sang syudad sang Iloilo agud nga may sakyan ang mga pasahero.
Ang mga pribado nga salakyan naman ang mahimo nga makasulod sa syudad sang Iloilo apang kinahanglan lang nga magpaidalom sa quarantine procedures.
