ILOILO CITY – Indi magduha-duha ang Public Safety and Transportation Management nga ipauntat ang byahe sang mga tricycle bangud sa paghingalit sang mga driver.
Ini ang kasunod sang mga reklamo tuhoy sa tuman ka mahal nga pagpanukot sang tricycle drivers apisar nga malapit man lang ang distansya nga pagadul-ongan sa ila pasahero.
Sa interview sang Bombo Radyo kay Jeck Conlu, pinuno sang Public Safety and Transportation Management Office, iya ginpahayag nga indi dapat mag-abusar ang mga tricycle driver bangud nga wala sang byahe ang Public Utility Jeepney.
Suno kay Conlu, wala gina-istriktohan ang mga nagabyahe sang tricycle apang wala ini nagakahulugan nga may yara na sila sang kinamatarong nga magsukot sang tuman ka mahal.
Ginpahayag ni Conlu nga subong ang tion agud nga magbinuligay ilabi pa nga may krisis sa pungsod.
