ILOILO CITY – Nag-umpisa na ang pagpanghatag sang bulig sang Iloilo City Government sa mga pumuluyo may kaangtanan sa ginapatuman nga Enhanced Community Quarantine.
Sa interview sang Bombo Radyo kay Iloilo City Mayor Jerry Treñas, iya ginpahayag nga umpisa kahapon nga adlaw, nag-umpisa na ang community kitchen sa tagsa ka barangay kun sa diin may yara sang aroz caldo nga ginluto halin sa donasyon.
Suno kay Treñas, ang mga day care worker na ang magadumala sang community kitchen tubtub nga matapos ang Enhanced Community Quarantine.
Ginpahayag man ni Treñas nga may yara man sang ginhatag nga food assistance para sa mga taxi driver kasunod sang pagpaunta sang byahe paglampas 8:00 karon sa gab-i.
Magluwas sa pagkaon, may yara man sang gindonar nga isda kag P1 Million gikan sa pribado nga sektor kun sa diin ang katunga sang kantidad ang ginbakal sang 500 ka sako sang bugas kag ang nabilin naman ang natalana nga ibakal sang test kits sa tion nga aprobahan na ang ginhimo sang University of the Philippines – National Institutes of Health.
Magluwas sa P1 Million nga cash, may yara pa sang iban nga nagdonar sang dalagku nga kantidad, sinako nga bugas kag iban pa nga kinahanglanon samtang, madamo pa ang nagpromisa nga magahatag sang bulig.
Bangud nga ginpaidalom na sa Enhanced Community Quarantine ang syudad sang Iloilo, mahimo na nga magamit sang tagsa ka barangay ang calamity fund agud nga ibulig sa mga apektado nga residente.
Isa man sa ginapangitaan sang paagi sang alkalde amo nga makabakal sang Personal Protective Equipment ilabi na sa mga medical personnel nga amo ang naga-atipan sang mga pasyente.
Bilang kabahin sang preventive measures, ginpahayag sang natungdan nga dapat anay nga magsakripisyo ang tanan ilabi pa nga ginsuspende ang byahe sang Public Utility Vehicles magluwas sa 30 ka bus nga ginpahanugutan, umpisa buwas, nga makabyahe agud nga mag-akomodar sang mga pasahero.
Plano man sang alkalde ang pagbalay sang proposed ordinance nga magapatuman sang 24 hour curfew sa bug-os nga syudad kasunod sang memorandum gikan sa Office of the Presidential Assistant for Visayas apang may yara lang sang exemptions ilabi na kun emerhensya kag kun may importante nga transaksyon.
Nahibalu-an nga sa Memorandum, ginadumili-an ang mga estudyante kag ang naga-edad sang 65 anyos pataas nga magpasayang-sayang bangud nga sila ang ginakabig nga prone sa virus.
