ILOILO CITY- Nagpanghatag sang food assistance ang Iloilo City Government sa mga naapektuhan sang untat-byahe bangud sa Enhanced Community Quarantine.
Sa interview sang Bombo Radyo kay Iloilo City Mayor Jerry Treñas, iya ginpahayag nga nasugudan na ang pagpanghatag sang foodpacks nga ginalakipan sang canned goods kag bugas.
Suno kay Treñas, ang iban nga mga jeepney, tricycle kag taxi drivers ang nahatagan na sang foodpacks kag nagalaum siya nga mahatagan na sa subong ang tanan nga apektado.
Samtang, mangin operational naman ang 240 ka mga community kitchen sa syudad kag ang mga parent leader sang Pantawid Pamilyang Pilipino Program ang magabulig sa paghanda sang pagkaon.
Nagbakal man sang dalagko nga mga kaldero kag luwag agud magamit sa pagluto sa community kitchen nga nahamtang sa tagsa ka mga kindergarten centers.
