ILOILO CITY – Napili-an bilang COVID-19 hospital ang Western Visayas Medical Center sa Mandurriao, Iloilo City.
Ini ang ginkumpirma ni Dr. Mary Jane Juanico, pinuno sang Infectious Disease Section sang Department of Health 6, matapos ang pagsinapol nga ginpatawag ni Iloilo City Mayor Jerry Treñas kaupod ang mga tiglawas gikan sa nasambit nga ahensya.
Sa interview sang Bombo Radyo kay Juanico, iya ginpahayag nga ang Western Visayas Medical Center ang napili-an bangud nga ini ang ginakabig nga level 3 hospital.
Suno kay Juanico, may yara sang madamo nga equipment kag specialist ang nasambit nga hospital rason nga nagakabagay lamang nga ini ang himuon nga COVID-19 hospital.
Ginpahayag ni Juanico nga ang mga pasyente nga may yara sang lain nga balati-an ang sayluhon sa iban nga mga hospital agud nga indi malatnan sang virus.
Apisar nga mangin COVID-19 hospital na ang Western Visayas Medical Center, mahimo sa gihapon ini nga magbaton sang severe patient ukon mga pasyente nga may tuman ka lala nga balati-an ilabi na kun ang equipment kag ang doktor nga kinahanglan ang yara sa nasambit nga hospital.
Sa subong, ginahitso na ang Executive Order agud nga promal na nga madeklarar ang Western Visayas Medical Center bilang COVID-19 hospital.
