ILOILO – Ipanghatag na sa Huwebes, Marso 26, ang Enhanced Community Quarantine pass ilabi na sa mga nagatrabaho sa guwa sang probinsya sang Iloilo.
Sa interview sang Bombo Radyo kay Iloilo Gov. Arthur Defensor Jr., iya ginpahayag nga nakasugtan sa ginpatigayon nga pagsinapol kaupod ang mga alkalde nga ang mga nagatrabaho sa iban nga probinsya ang kinahanglan nga magkuha sang Enhanced Community Quarantine pass nga pirmado sang gobernador.
Suno kay Defensor, ang mga may yara sang transaksyon ukon trabaho nga yara lamang sa probinsya sang Iloilo ang indi na kinahanglan nga magkuha sang Enhanced Community pass sa baylo, mahimo nga magkuha sang local quarantine pass halin sa punong barangay ukon alkalde.
Ginpahayag ni Defensor nga ang katuyu-an sang paghatag sang quarantine pass ang limitado lamang para sa trabaho, pagbakal sang kinahanglanon kag bulong, kun may yara sang emerhensya kag ang kada pamilya ang pagahatagan sang isa ka quarantine pass.
Kadungan sang ginapatuman nga Enhanced Community Quarantine, nagahingyo ang gobernador nga indi dapat maapektuhan ang delivery sang supply sang pagkaon kag iban pa nga kinahanglanon.
Mahimo lang nga ipatuman ang lockdown sa isa ka banwa suno sa natungdan kun may yara sang duha ka kumpirmado nga kaso sang Coronavirus Disease 2019 (COVID-19).
