GUIMBAL, ILOILO – Temporaryo nga wala ginpapauli sa ila tagsa ka puluy-an ang tanan nga personnel sang Guimbal Municipal Police Station kasunod sang labing una nga kaso sang Coronavirus Virus Disease 2019 (COVID-19) sa Guimbal, Iloilo.
Sa interview sang Bombo Radyo kay Police Lt. Col. Nelson Caro, hepe sang Guimbal Municipal Police Station, iya ginpahayag nga tanan nga mga personnel ang indi anay makapauli sa ila balay agud nga masiguro nga indi malatnan sang virus ang ila pamilya.
Suno kay Caro, wala man sang close contact ang tanan nga personnel sa pasyente nga nagpositibo sa COVID-19 apang mas makapaayo nga sundon ang protocol agud nga indi na madugangan ang numero sang mga nagpositibo sa nasambit nga virus.
Ginpahayag ni Caro nga ginasunod man sang tanan nga personnel ang basic preventive measures agud nga indi malatnan sang COVID-19.
Apisar nga naka-quarantine, ginpahayag sang natungdan nga padayon ang ila trabaho bilang frontliners apang indi sila mahimo nga makapadulong sa iban nga banwa sa probinsya sang Iloilo.
Naglab-ot sa 101 ka mga pulis sa Police Regional Office 6 ang ginakabig nga Persons Under Monitoring.
Sa interview sang Bombo Radyo kay Police Lt. Col. Joem Malong, tagpamaba sang Police Regional Office 6, iya ginpahayag nga ang 101 ka mga pulis ang may yara sang travel history sa mga lugar nga may yara sang kaso sang Coronavirus Disease 2019 (COVID-19) samtang ang isa naman ang himata sang nagpositibo sa nasambit nga virus.
Suno kay Malong, ang nasambit nga mga pulis ang naka-home quarantine apisar nga wala nakitaan sang sintomas ang COVID-19.
Ginpahayag ni Malong nga ang isa ka pulis ang naga-istar malapit sa balay sang COVID-19 patient apang wala sang close contact nga natabo.
