ILOILO CITY – Ginaduso sang Barangay Council sang Ma. Clara, Iloilo City nga kun mahimo indi na lang paghimuon nga isolation area ang isa ka building sang Ateneo de Iloilo.
Sa interview sang Bombo Radyo kay Punong Barangay Rizalino Salazar, iya ginpahayag nga sa subong, wala pa nakapakig-angot sa iya ang Iloilo City Government tuhoy sa plano nga pagabutangan sang mga pasyente nga nakitaan sang sintomas sang Coronavirus Disease 2019 (COVID-19) ang isa ka building sa Ateneo de Iloilo nga yara sa ila barangay.
Suno kay Salazar, wala man siya sang may mahimo kun dayunon sang Iloilo City Government ang nasambit nga plano apang kun mahimo, mas makapaayo nga ang isolation area ang ibutang sa indi populated area agud nga wala sang may malatnan.
Apisar sang kahangawa nga dala sang nasambit nga plano, ginpahayag sang Punong Barangay nga nagasalig siya sa Iloilo City Government sa pagpamuno ni Mayor Jerry Treñas.
Para naman sa isa ka concerned citizen nga nagpahinago lang sang pangalan, tuman ang iya kahangawa sa posibilidad nga malatnan sila sang COVID-19 sa tion nga himuon nga isolation area ang Ateneo de Iloilo.
Suno sa concerned citizen, malapit gid ang iya balay sa nasambit nga eskwelahan kag indi malayo nga malatnan sila sang virus.
Magluwas nga madamo ang pamalay, ginpahayag man sang concerned citizen nga madamo man ang boarding house nga malapit sa Ateneo de Iloilo rason nga daku ang posibilidad nga madasig ang paglaton sang COVID-19.
