BUENAVISTA, GUIMARAS – Ginadumili-an na ang mga depampasahero nga jeep kag van nga magbyahe epektibo subong nga adlaw sa Buenavista, Guimaras.
Ini ang base sa ginpaguwa nga Executive Order No.18 ni Buenavista Mayor Eugene Reyes.
Sa interview sang Bombo Radyo kay Mayor Reyes, iya ginpahayag nga na desisyonan nga dumilian ang mga dempampasahero nga jeep kag van sa pagbyahe agud nga ma practice ang physical distancing.
Suno kay Reyes, ang ginapahanugtan lamang nga makabyahe amo ang mga tricycle kag trisikad nga may isa lang ka pasahero nga nagasakay.
Kun duha ka mga pasahero ang nakasakay sa tricycle ukon sa trisikad, pahanugutan man ini sang local government unit apang kinahanglan nga ang duha ka mga persona ang yara naga istar sa isa lang ka balay.
Pahayag niya, indi man mahimo nga makabyahe ang mga single nga motor nga ginagamit sa pagbyahe magluwas lamang kun “family use” , duha lang ka persona ang mahimo makasakay lakip na diri ang nagamaneho kag isa lang ka balay ang ginatiniran.
Sa sin-o man ang magalapas sa Executive Order No. 18 sang Buenavista, Guimaras, ginasiguro sang alkalde nga pasakaan niya ini sang kaso.
Gin-athag man ni Mayor Reyes nga wala ginpaidalom sa lockdown ang probinsya sang Guimaras kag sa subong yara pa lamang ini sa level 1 response.
