ILOILO – Ginmandu na ni Iloilo Police Provincial Office Officer-in-Charge Police Col. Paul Kenneth Lucas ang pagdumili sang angkas sa motorsiklo sa probinsya sang Iloilo.
Sa interview sang Bombo Radyo kay Lucas, iya ginpahayag nga wala na sang exemption nga ipatuman agud nga masunod ang ginaduso nga physical distancing.
Suno kay Lucas, mahimo nga dumili-an man ang mga tricycle nga magkarga sang masobra sa isa nga pasahero.
Antes ang istrikto nga pagpatuman sang nasambit nga mandu, kinahanglan anay nga hatagan sang warning ang mga madakpan.
Kun sulit-sulit ang violation, mahimo na nga dakpon ang magalapas sa nasambit nga pagsulundan.
Ang delivery sang goods naman ang exempted sa border restrictions apang kinahanglan nga kumpleto sa dukomento kasubong sang permit kag medical certificate ang driver kag ang pahinante.
Ipaidalom man sa inspection ang karga agud masiguro nga wala sang kontrabando nga makalusot kadungan sang ginapatuman nga Enhanced Community Quarantine.
