ILOILO CITY – Ginkumpirma sang pamunu-an sang Iloilo Doctors’ Hospital nga na-admit sa nasambit nga hospital ang napatay nga 72 anyos nga lalaki nga nagpositibo sa Coronavirus Disease 2019 (COVID-19).
Sa exclusive interview sang Bombo Radyo kay Dr. Ludovico Jurao, Assistant Administrator for Patient Care sang Iloilo Doctors’ Hospital, iya ginpahayag nga na-admit ang nasambit nga pasyente sang Marso 20 kag gilayon nga ginkabig nga Person Under Investigation matapos naka-angkon sang Severe Pneumonia kag natukiban man nga may travel history sa Metro Manila.
Sang Marso 21 suno kay Jurao, nag-angkon sang Acute Respiratory Distress Syndrome ang nasambit nga pasyente kag ginbawi-an sang kabuhi.
Ginpahayag ni Jurao nga wala sang dapat kahangaw-an bangud nga may yara sang isolation area ang mga Persons Under Investigation nga na-admit sa nasambit nga hospital.
Apisar sang limitado nga Personal Protective Equipment, ginpasalig sang natungdan nga wala nagapabaya ang tanan nga medical staff sa pagtatap sang mga pasyente.
Nahibaluan nga ang 72 anyos nga COVID-19 patient ang isa lamang sa 13 ka kumpirmado nga kaso sa Western Visayas santo sa abiso nga ginpaguwa sang Department of Health kahapon.
