ILOILO CITY– Magalawig sang lima ka adlaw ang pagpatigayon sang total closure sa Iloilo Terminal Market.
Sa interview sang Bombo Radyo kay Ariel Castañeda, pinuno sang Local Economic and Enterprise Office, iya ginpahayag nga ang total closure ang patigayunon umpisa buwas, Marso 29 tubtub Abri 2.
Suno kay Castañeda, mismo ang mga Punong Barangay kag Market Vendors ang nagduso nga temporaryo anay nga siraduhon ang merkado agud nga mahatagan sang ligwa ang pagpaninlo.
Ginpahayag ni Castañeda nga lakip sa pagatinlu-an amo ang sulod kag ang saguwa sang merkado rason nga dumili-an anay ang mga manugbolante.
Pagkatapos sang lima ka adlaw, may yara sang pagsinapol nga patigayunon agud maistoryahan kun ano ang nga mga pamaagi ang himuon agud nga indi magdinaguso ang manugbakal sa sulod sang merkado.
Pabor ang Vendors Association sa patigayunon nga pagpaninlo sa Iloilo Terminal Market.
Sa interview sang Bombo Radyo kay Punong Barangay Woody Dela Riarte, miyembro sang Vendors Association sa nasambit nga merkado, iya ginpahayag nga mas makapaayo kun makuha ang tanan nga higko kag obstruction sa sulod sang merkado.
Suno kay Dela Riarte, kinahanglan nga mahawanan ang alagyan agud nga masunod ang ginapanugyan ng physicial distancing.
Ginpahayag ni Dela Riarte nga mas makapaayo kun matigayon sa sulod sang lima ka adlaw ang pagpaninlo apang kun indi gid masarangan, ipasirado ang merkado tubtub sa Abril 11.
Ginaduso man sang natungdan nga kun tani pahanugutan ang whole sale sang ulutanon agud nga indi maapektuhan ang supply sa bilog nga syudad lakip na sa probinsya sang Iloilo.
