BAHAMAS – Naka quarantine ang tanan nga crew sang Scarlet Lady cruise ship nga yara subong sa tunga lawod nga sakop sang Bahamas.
Ang Scarlet Lady cruise ship amo ang bag-o kag pinaka una nga cruise line sang Virgin Group of Companies.
Sa interview sang Bombo Radyo kay Dionel Catunao, tumandok sang Dumangas, Iloilo kag crew sa nasambit nga cruise ship, iya ginpahayag nga halin sa Italy ang barko kag padulong na kuntani sila sa New York City apang bangud nga ginsirado sang NYC ang ila nga mga terminal, indi na mahimo pa makadungka ang ila nga barko.
Suno kay Catunao, Pebrero 14 sila nagpadulong sa Italy kag naka shore leave sila duha ka bulan sa nasambit nga pungsod.
Matapos ang tatlo ka adlaw nga paghalin nila sa Italy, gilayon naglupok ang balita nga madamo na sang mga persona nga nagpositibo sa coronavirus disease 2019.
Ginsuspende naman ang operasyon sang nasambit nga cruise ship kag ginpapanaog ang tanan nga mga pasahero kag ang mga crew members apang sila nga mga Filipino ang wala sang choice kundi magpabilin na lamang sa barko.
Ini bangud nga apisar magpauli sila sa Pilipinas, indi sila sa gihapon makapauli sa ila tagsa ka mga probinsya bangud sa ginapatuman nga enhanced community quarantine kag sirado man ang mga paluparan.
Pahayag ni Catunao, wala nagapabaya ang kompaniya sa paghatag sang kinahanglan nila lakip na diri ang pagkaon kag bulong.
Dugang pa sang natungdan, inagurahan pa lang kuntani ang cruise ship apang gin-sugata na sang covid-19 pandemic.
Tubtob naman sa bulan sang Hulyo suspendido ang operasyon sang Scarlet Lady cruise ship.
