ILOILO CITY- Indi kinahanglan nga pakamalauton suno kay Iloilo City Mayor Jerry Treñas ang iban nga opisyales sa syudad , bangud kada isa sa ila ang may ginatungdan nga responsibilidad sa away kontra coronavirus diease 2019.
Ini matapos nakabatun sang pagpakamalaot si Vice Mayor Jeffrey Ganzon kag mga konsehal sang syudad bangud ginapahayag nga wala ang mga ini sang hinimuan kag indi visible sa mga programa sang syudad sang Iloilo.
Sa interview sang Bombo Radyo kay Treñas, iya ginpahayag nga ginahimo sang bise alkalde kag sang mga konsehal ang ila masarangan agud makabulig sa pumuluyo sa sining tion sang krisis.
Suno kay Treñas, lakip sa mga hinimuan ni Ganzon kag sang mga konsehal, amo ang legislation nga nagahatag sang budget nga P74 million sa syudad sang Iloilo, agud ipamakal sang mga kinahanglanon sa pakipagbato kontra covid-19 outbreak.
Pahayag pa sang alkalde, ang tanan ang nagabinuligay kag ang tanan nga mga opisyales sang syudad ang nagahimo sang ila tagsa ka mga katungdanan.
