ILOILO CITY – Ginaduso ni Iloilo City Mayor Jerry Treñas nga ipaidalom sa swab test ang tanan nga Persons Under Monitoring kag Persons Under Investigation.
Sa interview sang Bombo Radyo kay Treñas, iya ginpahayag nga ang katuyu-an sang pagpatigayon sang swab test amo nga mahibalu-an sa gilayon kun sa day sin-o ang positibo sa Coronavirus Disease 2019 (COVID-19).
Suno kay Treñas, paagi sa early detection, matapna ang local transmission sang nasambit nga virus ilabi na nga nagsaka sa tatlo ang kumpirmado nga kaso sa syudad sang Iloilo.
Ginpahayag ni Treñas nga ang City Health Office na ang may katungdanan sa pagpatigayon sang swab test.
Naglab-ot sa 54 ang Persons Under Investigation kag 2,368 naman ang Persons Under Monitoring sa syudad sang Iloilo.
Sa data sang City Health Office as of March 29, may yara sang isa ka napatay kag duha ang kumpirmado nga kaso apang sa ginpaguwa nga abiso sang Department of Health 6 as of March 30, nagsaka sa tatlo ang COVID-19 cases.
Suno kay Dr. Roland Jay Fortuna sang City Health Office kag focal person for Coronavirus Disease 2019, halos katunga sang Persons Under Monitoring ang nakatapos na sa 14-day quarantine samtang masobra naman sa 500 ang yara sa active monitoring.
Sa Iloilo Central School, walo ka Persons Under Monitoring ang nagapabilin samtang tatlo naman ang Persons Under Investigation.
