ILOILO CITY – Linibo na ang naga-apply agud nga makakuha sang financial assistance sa Department of Labor and Employment.
Ini ang kasunod sang paglunsyar sang nasambit nga ahensya sang COVID-19 Adjustment Measures Program (CAMP), Tupad Barangay Ko, Bahay Ko program kag iban pa nga cash assistance program.
Sa interview sang Bombo Radyo kay Niezel Sabrido, tagpamaba sang Department of Labor and Employment 6, iya ginpahayag nga madamo na ang nagpasa sang requirements agud nga makakuha sang financial assistance.
Suno kay Sabrido, para sa COVID-19 Adjustment Measures Program, ang empleyado sa pribado nga kompaniya nga may yara sang flexible working arrangement kag ang mga nagpatuman sang temporary closure ang makabaton sang P5,000 nga cash assistance.
Ginpahayag ni Sabrido nga para naman sa Tupad Barangay Ko, Bahay Ko program, ang informal sector workers ang makabaton sang P395 per day nga sweldo sa sulod sang 10 ka adlaw.
Ang requirements ang mahimo ipadala sa doleiloilocamp@gmail.com ukon ipasa direkta sa talatapan sang Department of Labor and Employment.
Indi kwalipikado nga magbaton sang cash assistance ang mga nakabaton na nga daan sang cash assistance gikan sa iban nga ahensya sang gobyerno.
