NEW YORK CITY – Ginakabig nga epicenter sang coronavirus disease 2019 sa Estados Unidos ang New York City nga may yara sang 1,218 na ang nagkalamatay.
Sa report ni Bombo International Correspondent Alex Vidal, iya ginpahayag nga tagsa ka adlaw, naga dugang ang mga kaso sang nagkalamatay sa New York City bangud sa COVID-19.
Ang Elmhurst Hospital sa Queens, New York ang isa sa pinakadako nga ospital sa Estados Unidos kag may yara man sang pinakamadamo nga kaso sang mga napatay bangud sa COVID-19.
Sang nakaligad nga Sabado, naguwa si Vidal sa iya ginatiniran nga balay malapit sa nasambit nga ospital agud kuntani nga mag pa check-up apang iya ginkakibot nga sa iya pagpadulong, nagadugok ang mga tawo samtang naga singgitan kag halos tanan ang naga ubo.
Suno kay Vidal, magluwas sa singgit sang mga tawo sa ospital, nagahuni man ang sirena sang ambulansya sa diin masako ini sa paghakot sang mga pasyente.
Sa pagkamatuod, ang isa ka doktor nga si Dr. Collin Smith sang operating room ang naghilibi-on bangud sa sitwasyon sang ospital.
Pahayag niya, may mga bangkay man nga ginabutang sa refrigerated truck apang indi lang niya mapat-od kun diin ini gilayon ginadala.
Agud nga ma hagan-hagan ang mga pasyente nga ginadala sa mga ospital, nagpadala si US President Donald Trump sang Navy hospital ship sa New York City nga may 1,000 beds, 12 operating rooms kag full medical staffs.
