AJUY, ILOILO – Nakalab-ot na kay Mayor Jett Rojas ang reklamo tuhoy sa ginpanghatag nga bugas nga gintunaan sang paglain sang pamatyag sang mga senior citizen sa Sitio Nabali-an, Brgy. BarRido, Ajuy, Iloilo.
Sa interview sang Bombo Radyo sa concerned citizen nga si Rodrigo Basa, iya ginpahayag nga bugas halin sa National Food Authority ang ginpanghatag sa ila.
Suno kay Basa, nagreklamo ang mga senior citizen nga naglain ang ila pamatyag matapos nakakaon sang bugas.
Wala man sang problema kun sa diin naghalin ang bugas apang ang problema lang suno kay Basa amo nga indi maayo ang kalidad sang bugas kag ila ini nga ginbalik sa Barangay Hall.
Sa subong, wala pa nakahatag sang sabat ni Punong Barangay Fe Songcayauon tuhoy sa nasambit nga reklamo.
