GUIMBAL, ILOILO – Gindayaw ni Guimbal Mayor Oscar Garin si Department of Health 6 Director Dr. Marlyn Convocar sa pagbawi sang deklarasyon nga ginakabig nga Persons Under Monitoring ang tanan nga Guimbalanon.
Sa interview sang Bombo Radyo kay Garin, iya ginpahayag nga nagtuga sang kakugmat kag diskriminasyon ang nasambit nga deklarasyon apang dalayawon ang nangin lihok sang Department of Health agud athagon ang ila nauna nga pahayag.
Suno kay Garin, mas makapaayo kun maghalong ang Department of Health sa pagpaguwa sang pahayag ukon abiso bangud nga ang nasambit nga ahensya lamang ang ginasaligan sang tanan kun update sa Coronavirus Disease 2019 (COVID-19) ang pagahambalan.
Ginpahayag ni Garin nga antes pa man ang nasambit nga deklarasyon sang Department of Health, madugay na nga ginpatuman sa banwa sang Guimbal ang home quarantine kun sa diin ang mga may yara lamang sang quarantine pass sa tagsa ka clustered household ang ginapahanugutan nga makaguwa agud magpamalaklon.
Ang mga barangay kun sa diin naghalin ang mga nagpositibo sa COVID-19 ang ginkordon naman suno sa alkalde agud nga malimitahan ang risgo sang local transmission.
Agud nga indi malatnan sang virus, mas makapaayo suno sa natungdan nga magpabilin sa sulod sang balay kun wala man lang sang emerhensya.
