ILOILO CITY – Ginkumpirma sang medical experts sang The Medical City Iloilo nga nakaguwa na sa hospital ang labing una nga Coronavirus Disease (COVID-19) survivor sa Panay Island.
Sa interview sang Bombo Radyo kay Dr. Felix Ray Villa, Chief Executive Officer sang The Medical City Iloilo, iya ginpahayag nga ang nasambit nga COVID-19 survivor ang nakaguwa sa hospital matapos nagnegatibo sa virus.
Suno kay Villa, ang nasambit nga survivor amo ang babayi nga COVID-19 patient gikan sa Mandurriao, Iloilo City.
May kaangtanan diri, ginpasalamatan man ni Villa ang pagpanikasog sang healthcare workers, critical team kag ang bug-os nga workforce sang The Medical City Iloilo sa pag-atipan sang mga pasyente lakip na sa apat ka Persons Under Investigation.
Sa subong, isa na lang ka lalaki nga COVID-19 positive gikan sa Guimbal, Iloilo kag apat ka Persons Under Investigation ang nagapabilin sa nasambit nga hospital.
Wala pa nahibalu-an suno sa natungdan kun san-o liwat ipaidalom sa test ang pasyente nga halin sa banwa sang Guimbal samtang ginahulat naman ang resulta sang apat ka Persons Under Investigation.
