ILOILO CITY – Kapin sa 100 ang gindakop sang mga pulis bangud sa indi pagsunod sa physical distancing kag indi pagsuksok sang facemask sa syudad sang Iloilo.
Mismo si Police Major Francisco Paguia Jr., hepe sang Police Station 1, ang nagpanguna sa pagpangdakop sa mga wala nagasunod sa nasambit nga pagsulundan.
Suno kay Paguia, kalabanan sa mga nagkaladakpan ang may dala nga Home Quarantine Pass apang sang ginpamangkot, wala sila sang rason kun ano ang ila katuyuan sa pagguwa sa ila ginatiniran.
Siyam sa mga nagkaladakpan amo ang mga babayi, 62 ang lalaki kag 11 ang menor de edad.
Indi lamang ang mga nagalakat sa dalan ang ginadakop ukon ginasita kundi gina-usisa man ang nagasakay sa salakyan agud mahibalu-an kun bala ginasunod ang physical distancing.
Ginpangtipon sa Iloilo Freedom Grandstand ang mga nagkaladakpan, ginhatagan sang paandam kag ginpalantaw sang documentary tuhoy sa COVID-19.
