ILOILO CITY – Isa lang sa tagsa ka household ang makabaton sang ayuda sa idalom sang Social Amelioration Program.
Sa interview sang Bombo Radyo kay Mae Castillo, tagpamaba sang Department of Social Welfare and Development 6, iya ginpahayag nga 1.8 Million ang target beneficiaries sa Western Visayas apang lauman nga madamo ang indi madala sa listahan sang kwalipikado nga benepisyaryo.
Suno kay Castillo, isa lang sa tagsa ka pamilya ang mahimo nga makabaton sang ayuda kag prayoridad ang mga pinaka pigado.
Ginpahayag ni Castillo nga ang Pantawid Pamilyang Pilipino Program beneficiaries ang automatic nga makabaton sang P6,000 apang igabuhin diri ang Cash Grant kag Rice Subsidy.
Ang mga Senior Citizen naman suno sa natungdan ang indi na kinahanglan nga mag fill-in sang form agud nga makabaton sang P6,000 magluwas sa Social Pension.
Kun nagaserbe naman nga head of the family ang Senior Citizen, kinahanglan nga mag fill-in sang form nga mahimo makuha sa barangay officials.
Indi naman makabaton sang ayuda sa idalom sang Social Amelioration Program ang mga nakabaton na sang cash assistance gikan sa iban nga ahensya sang gobyerno.
Ang barangay officials na ang may daku nga katungdanan sa pagtumod sang kwalipikado nga benepisyaryo samtang magapatigayon naman sang validation ang Department of Social Welfare and Development.
