ILOILO CITY – May yara sang nagkalain-lain nga mental health needs ang tagsa ka tawo ilabi na subong nga may yara sang pandemic.
Sa Good Morning Philippines program, ginpahayag ni Abigaile Capay, Co-chair, Assessment Division sang Psychological Association of the Philippines, nga ang tagsa ka tawo ang may yara sang nanari-sari nga mental health needs, depende sa sitwasyon.
Suno kay Capay, nanari-sari nga concerns ang nabaton sang Western Visayas Psychosocial Support for COVID-19 umpisa sang ginbuksan ini sang nagligad nga semana.
Ginpahayag ni Capay nga ang kalabanan sa nagapangayo sang panugyan amo ang mga nagabatyag sang kahangawa nga malatnan sang virus ilabi na ang frontliners kag ang mga may yara sang himata nga nagpositibo sa Coronavirus Disease 2019 (COVID-19).
Magluwas sa kahangawa, ang iban naman ang nakabatyag sang boredom kag kahidlaw sa ila pamilya bangud sa ginapatuman nga Enhanced Community Quarantine.
Importante suno sa natungdan nga tutukan ang emosyon ilabi na subong nga may ginapangatubang nga krisis sa pungsod.
Ang pinaka-importante sa subong suno kay Capay amo nga magpabilin sa balay kun wala man lang sang trabaho ukon importante nga transaksyon agud nga malimitahan man ang risgo sang local transmission.
