ILOILO – Nakadepende sa mangin sitwasyon sa Abril 14 ang mangin desisyon ni Iloilo Gov. Arthur Defensor Jr. kun bala palawigon ang pagpatuman sang Enhanced Community Quarantine.
Sa interview sang Bombo Radyo kay Defensor, iya ginpahayag nga kun magtaas pa ang numero sang Persons Under Monitoring kag Investigation tubtub sa Abril 14, kinahanglan ang dugang nga 14 ka adlaw para sa quarantine apang wala ini nagakahulugan nga palawigon man ang Ehanced Community Quarantine sa bug-os nga probinsya sang Iloilo.
Suno kay Defensor, madamo sang dapat nga ikonsiderar antes palawigon ang lockdown bangud nga apektado ang tanan.
Ginpahayag ni Defensor nga kun magtaas man ang numero sang mga nakitaan sang sintomas sang Coronavirus Disease 2019 (COVID-19), mahimo nga hugton lang ang pagpatuman sang quarantine sa lugar kun sa diin naghalin ang pasyente.
Mahimo man nga limitahan ang byahe sang transportasyon, pagpatigayon sang aktibidad kag pagnegosyo sa probinsya tubtub nga wala na sang may magpositibo sa nasambit nga virus.
