Gobyerno sang Canada, todo-bulig sa mga empleyado nga nadulaan sang trabaho kag negosyo nga ginsirado bangud sa COVID-19 pandemic

CANADA – Wala may naga guwa sa Canada samtang ginapatuman ang home quarantine bangud may yara sang multa sa tion nga madakpan.

Suno kay Bombo International Correspondent Nowell Patrick Relatos direkta sa Canada, nakulbaan ang mga tawo sa Canada nga magguwa bangud may yara sang multa nga 800 CAD tubtob 1,500 CAD ukon P28,000 tubtob P54,000.

Makahalam-utan lang pahayag ni Relatos bangud kun ang mga Filipino yara sa iban nga pungsod, disiplinado man ini kag nagasunod gilayon sa mga pagsulundan apang kun diri lang sa Pilipinas, madamo gid ang mga nagalapas bangud wala man sang multa.

Samtang kun numero naman sang Coronavirus Disease 2019 (COVID 19) cases ang pagahambalan, nagdangat na sa 16,353 ang mga nagpositibo, 323 ang napatay kag 3,616 naman ang naka rekober.

Kalabanan sa mga COVID-19 patients amo ang mga tigulang nga yara sa nursing homes.

Pahayag ni Relatos, ginabuligan sang gobyerno sang Canada ang mga tawo nga wala sang trabaho bangud nga ginpasirado ang mga establisimento sa diin makabaton ang mga ini sang 2,000 CAD ukon P72,000.

Samtang sa bahin naman sang mga negosyo nga indi pagpasiraduhon ukon pagpa untaton, mismo ang gobyerno ang masabat sang 75% nga gasto sa sweldo sang mga empleyado sang isa ka kompaniya.