ILOILO CITY – Naglab-ot sa P94 Million ang dugang nga pondo nga batunon sang Iloilo City Government sa idalom sang Bayanihan to Heal As One Act.
Sa interview sang Bombo Radyo kay Iloilo City Mayor Jerry Treñas, iya ginpahayag nga tuman ang iya pagpasalamat kay Presidente Rodrigo Duterte sa pagpirma sa nasambit nga cash grant.
Suno kay Treñas, ang nasambit nga kantidad ang igahatag bilang ayuda sa idalom sang Social Amelioration Program kag kun may sobra, ini ang gamiton sa pagpatukod sang dugang nga idolation rooms, pagbakal sang bedding kag iban pa nga gamit sa tion nga magdamo ang Persons Under Investigation kag Persons Under Monitoring sa syudad sang Iloilo.
Ginaduso ni Treñas kay Iloilo Governor Arthur Defensor Jr. nga gamiton ang Iloilo Sports Complex bilang isolation facility agud nga mas madamo ang maakomodar nga pasyente.
Ginapangitaan man sang paagi sang alkalde nga makapatigayon sang mass testing sa labing madali nga tion kag ginatun-an man niya ang pagpalawig sang Enhanced Community Quarantine.
