ILOILO CITY – Mahimo nga sa masunod pa nga semana matapos ang pagpaninlo sa Iloilo Terminal Market.
Sa interview sang Bombo Radyo kay Iloilo City Mayor Jerry Treñas, iya ginpahayag nga madamo pa ang nabilin nga higko sa sulod sang merkado ilabi na sa drainage system.
Suno kay Treñas, mahimo nga subong nga semana matapos ang pagpaninlo kag sa Lunes, buksan ang nasambit nga merkado.
Kun tuhoy naman sa pagpatuman sang social distancing, ginpahayag sang alkalde nga iya ini nga ginatugyan sa Public Safety and Transportation Management Office sa bulig sang Philippine National Police.
Mayo bag-o na nga protocol sa pagpamalaklon sa guwa sang Iloilo Terminal Market, umpisa buwas nga adlaw, Abril 8.
Sa interview sang Bombo Radyo kay Jeck Conlu, pinuno sang Public Safety and Transportation Management Office, iya ginpahayag nga subong nga adlaw, ginpaguwa na ang guidelines kag implementation plan tuhoy sa panibag-o nga protocol.
Ang full implemetation suno kay Conlu ang ipatuman umpisa buwas nga adlaw kag ang mga magalapas ang pagahatagan sang nagakaigo nga sanction.
Kadungan sini, ang tanan nga vendors lakip na ang manugbakal ang kinahanglan nga magsuksok sang facemask kag dapat may yara sang dala nga quarantine pass.
Hugot man nga ipatuman ang social distancing samtang ang tanan nga dalan sa palibot sang merkado ang mangin No Vehicle Zone magluwas lang sa Rizal St.
