ILOILO – Nagdepensa si Sta. Barbara Mayor Rema Somo sa mga reklamo sang pila ka mga residente sang banwa sa gina-alegar indi makita ang alkalde sa lugar sa pihak sang Coronavirus Disease 2019 pandemic.
Ini matapos nga naglapta online ang video nga nagapakita sa mga tawo sa Sta. Barbara nga nagahiwat sang “spirit of the glass” kag ginapangita ang presensya sang alkalde.
Sa interview sang Bombo Radyo kay Mayor Somo, iya ginpahayag nga nagalibot siya sa mga kabarangayan sa banwa kag nagapakig-istorya sa mga punong barangay.
Suno kay Somo, indi matuod nga indi siya makit-an sa Sta. Barbara kag ang makapamatuod sina amo ang mga Punong Barangay sa banwa.
Pahayag niya, tagsa ka Sabado kag Domingo nga adlaw, nagalibot siya sa mga barangay kag masami man siya sa munisipyo.
Dugang pa sang natungdan, masami siya nga nagapangabay sa mga punong barangay nga indi pag pabay-an ang mga pumuluyo kag ipahanumdom gid nga proteksyonan ang ila mga kaugalingon.
Mahimo pahayag sang alkalde nga mga kontra lang niya sa pulitika ang nagapakalain sa iya.
