ILOILO – Emosyonal ang COVID-19 patient sa Iloilo samtang nagapangabay sa publiko nga maghalong kag magpangamuyo sa pihak sang ginapangatubang nga Coronavirus Disease 2019 (COVID-19) pandemic.
Sa exclusive interview sang Bombo Radyo kay Vivian, nagpositibo sa COVID-19 sa probinsya sang Iloilo, iya ginpahayag nga isa sila ka pamilya nga nagpositibo sa nasambit nga balatian sa diin nag umpisa ini sa iya nga amay nga nagtaliwan bangud sa virus.
Suno kay Vivian, tubtob subong indi pa niya ma pat-od kun diin nakuha sang iya amay ang balatian.
Apang pahayag niya, na expose ang amay sini 6 ka oras sa guwa sang ospital antes ini nga ma admit kag madamo man sang mga pasyente nga yara sagwa nga nagahulat.
Sang gin-isolate na ang amay ni Vivian, ang iya utod nga babaye ang nagbantay kag Marso 25 sang ginkuhaan ini sang swab, nahibaluan nga nagpositibo ini sa COVID-19 kag gin-transfer ini sa Western Visayas Medical Center.
Mahimo suno kay Vivian nga nalatnan siya sang COVID-19 sa iya nga utod nga babaye nga nagbantay sa iya nga amay nga nalatnan man sang virus.
Magluwas sa utod nga babaye kag kay Vivian nga nagpositibo sa COVID-19 nalatnan man sang virus ang iya nga iloy kag utod nga lalaki kag sila tanan ang lunsay asymptomatic.
Sa subong, naka home quarantine ang pamilya ni Vivian kag ginadul-ongan lang sila sang pagkaon sang local government unit sa diin ginatungtong lang ini saguwa ukon ginsab-it sa ila nga gate.
Ang komunikasyon sang tagsa sa ila ang ginapaagi lang sa cellphone agud nga indi sila maka istoryahanay sang personal.
Adlaw-adlaw man sila nga ginamonitor sang Rural Health Unit agud hibaluon ang ila nga kondisyon.
Dugang pa ni Vivian, wala man nila gingusto nga mangin positibo sa COVID-19 bangud bisan sin-o ang mahimo matapikan.
Ang ginasiguro subong sang pamilya nga ginahimo man nila tanan ang gina-abiso sa ila sang mga doktor agud nga maka rekober.
