Mga naka close contact sang mag-asawa nga nagpositibo sa COVID-19 sa Pavia, Iloilo, ginpaidalom sa swab test subong nga adlaw

PAVIA, ILOILO – Ginpaidalom subong nga adlaw sa swab test ang tanan nga naka-angkon sang close contact sa mag-asawa nga nagpositibo sa Coronavirus Disease 2019 (COVID-19) sa Pavia, Iloilo.

Sa interview sang Bombo Radyo kay Mayor Luigi Gorriceta, iya ginpahayag nga ang walo nga gintumod sang Rural Health Unit ang lunsay mga kaupod sa trabaho sang duha ka mga pasyente.

Suno kay Gorriceta, magluwas sa mga kaupod sa trabaho, ginkuhaan man sang sample ang tanan nga mga kaupod sang mag-asawa sa ila balay.

Nagapangabay man ang alkalde nga kun sin-o man ang naka-angkon sang close contact sa mag-asawa, mahimo nga magpadulong sa Rural Health Unit agud magpaidalom sa swab test.

Ang mag-asawa subong ang ginpaidalom sa home quarantine kaupod ang ila duha ka mga anak nga ginpaidalom sa swab test kahapon nga adlaw.