ILOILO CITY – Tatlo sa 47 ka pasahero nga sakay sang isa ka barko halin sa Cebu kag nagdungka sa syudad sang Iloilo ang nakitaan sang reactive antibodies matapos ginpaidalom sa rapid test.
Sa interview sang Bombo Radyo kay Dr. Roland Jay Fortuna, focal person for Coronavirus Disease 2019 (COVID-19) sang Iloilo City Health Office, iya ginpahayag nga sa 47 ka pasahero, 24 ang taga syudad sang Iloilo samtang naglab-ot naman sa 41 ang crew.
Suno kay Fortuna, ang isa ka pasahero ang nagpositibo sa antibodies nga IGG kag IGM samtang ang duha naman ang nagpositibo sa IGG kag kinahanglan nga ipaidalom sa confirmatory test.
Ginpahayag ni Fortuna nga protocol na nga sa tion nga may magdungka nga barko sa syudad sang Iloilo, ipaidalom gilayon sa rapid test, confirmatory test kag isolation ang mga sakay.
Magluwas sa mga pasahero, ipaidalom man sa rapid test kag isolation sa Iloilo Diamond Jubilee Hall ang crew sang barko samtang gilayon naman nga gin-disinfect ang barko agud nga makasiguro.
