ILOILO CITY – Kasubong nga nagbalik ang kasadya sang kadam-an sa ginpatigayon nga misa sa Jaro Metropolitan Cathedral kadungan sang Easter Sunday.
Nahibalu-an nga ang mga katapo lamang sang simbahan kag pila ka media representative ang ginpasulod sa Jaro Metropolitan Cathedral samtang may pila naman ka mga deboto nga nagapamati sa guwa sang simbahan.
Suno kay Jaro Archbishop Most Rev. Jose Romeo Lazo, D.D., kasubong nga nabuhinan ang pagkabalaka kag kahadlok nga nabatyagan sang tanan ilabi na subong nga may yara sang krisis.
Ginpahayag ni Lazo nga ang Dominggo sang Pagkabanhaw ang nagakahulugan nga indi dapat madulaan sang paglaum bangud nga mabatyagan ang kapawa kun nagasalig sa Ginuo.
Subong nga may krisis, ginpahayag ni Lazo nga ini ang tion agud magpatigayon sang adjustment ukon pagbag-o sa pagpangabuhi.
Paagi sa pagpangita sang solusyon kag pagpangamuyo sa Ginuo suno sa natungdan, malamuwasan gid ang ano man nga problema.
